Monday, May 20, 2019

परभणी लोकसभा निवडणूक राजकीय पक्षाच्या प्रतिनिधींना मतमोजणीविषयी माहिती दिली




      परभणी दि.20 :-  भारत निवडणूक आयोगाच्या निर्देशानूसार 17-परभणी लोकसभा मतदारसंघाच्या निवडणूकीची मतमोजणी 23 मे रोजी होणार आहे. या अनुषंगाने मुख्य निवडणूक निरीक्षक राजेंद्र सिंग आणि निवडणूक निर्णय अधिकारी तथा जिल्हाधिकारी पी.शिवशंकर यांनी सर्व राजकीय पक्षाच्या प्रतिनिधींची बैठक घेऊन माहिती दिली.
            जिल्हाधिकारी कार्यालयात झालेल्या या बैठकीत मतमोजणी केंद्राच्या ठिकाणी पोलिस बंदोबस्त, मतमोजणी प्रक्रियेची व्यवस्था, मतमोजणी केंद्रातील प्रवेश, निवडणूक प्रतिनिधी यांची माहिती तसेच राजकीय पक्ष व उमेदवारांच्या प्रतिनिधींसाठीच्या सुविधा व त्यांच्यासाठी आयोगाच्या निर्देशाविषयी माहिती देवून मतमोजणी प्रक्रीया शांततामय वातावरणात पार पाडण्यासाठी राजकीय पक्षांनी निवडणूक यंत्रणेला सहकार्य करावे असे आवाहनही यावेळी करण्यात आले.
            या बैठकीस उपजिल्हा निवडणूक अधिकारी महादेव किरवले, उपजिल्हाधिकारी श्रीमती स्वाती सुर्यवंशी, अतिरिक्त पोलीस अधिक्षक विश्व पानसरे, इतर अधिकारी व विविध पक्षाचे प्रतिनिधी उपस्थित होते.
-*-*-*-*-

Tuesday, May 7, 2019

महात्मा बसवेश्वर यांच्या जयंतीनिमित्त जिल्हाधिकारी कार्यालयात अभिवादन





      परभणी दि.7:-  महात्मा बसवेश्वर यांच्या जयंतीनिमित्त जिल्हाधिकारी कार्यालयात आयोजित कार्यक्रमात जिल्हाधिकारी पी.शिवशंकर यांनी  महात्मा बसवेश्वर यांच्या प्रतिमेस पुष्पहार अर्पण करून अभिवादन केले.
        यावेळी अप्पर जिल्हाधिकारी विश्वंभर गावंडे, उपजिल्हाधिकारी संजय कुंडेटकर, श्री.बिबे, उपविभागीय अधिकारी श्रीमती सुचिता शिंदे यांच्यासह अधिकारी-कर्मचारी यांनीही पुष्प अर्पण करून अभिवादन केले. या कार्यक्रमास जिल्हाधिकारी कार्यालयातील विविध विभागातील अधिकारी-कर्मचारी मोठ्या संख्येने उपस्थित होते.
-*-*-*-*-

Monday, May 6, 2019

नवीन वाहनांना एचएसआरपी नंबरप्लेट बसविण्याबाबत वाहन धारकांना आवाहन




      परभणी, दि. 6 :- जिल्ह्यातील सर्व वाहनधारक व चालकांनी दि.1 एप्रिल 2019 नंतर उत्पादित होणाऱ्या वाहनांना केंद्रीय मोटार वाहन नियम 1989 च्या नियम 50 नुसार एचआरएसपी नंबरप्लेट बसविणे बंधकारक असल्याने 1 एप्रिल 2019 नंतर उत्पादित व नोंदणी झालेल्या वाहनांना एचआरएसपी नंबरप्लेट संबंधित वाहन वितरकाद्वारे बसविण्यात येणार आहे. तरी वाहनधारकांनी एचआरएसपी नंबरप्लेट  वितरकाकडून बसवून घ्यावी. असे सहाय्यक प्रादेशिक परिवहन अधिकारी, परभणी यांनी कळविले आहे.
-*-*-*-*-

खते विक्री दुकानांची जिल्हाधिकाऱ्यांनी केली अचानक तपासणी





      परभणी, दि. 6 :- शहरातील नवा मोंढा परिसरातील रासायनिक खते विक्रेत्यांच्या दुकानांची जिल्हाधिकारी पी.शिवशंकर यांनी अचानक तपासणी करुन संशयीत मिश्र खताचे नमुने तपासणीसाठी  कृषी विभागाच्या अधिकाऱ्यामार्फत काढले तसेच ते पुढील तपासणीसाठी औरंगाबाद येथील खत तपासणी प्रयोगशाळेत पाठविले. तरी शेतकऱ्यांनी परवानाधारक कृषी विक्रेत्याकडूनच निविष्ठांची खरेदी करावी व खरेदी केल्यावर पक्की पावती घ्यावी असे आवाहन जिल्हाधिकारी पी.शिवशंकर यांनी केले आहे. यावेळी कृषी विभागाचे उपविभागीय कृषी अधिकारी सागर खटकाळे, तालुका कृषी अधिकारी प्रभाकर बनसावडे, गुणवत्ता निरीक्षक दिपक सामाले आदि उपस्थित होते.
-*-*-*-*-

महाश्रमदानप्रसंगी जिल्हाधिकारी पी.शिवशंकर यांनी केले श्रमदान








      परभणी, दि. 6 :- मौजे अरबुजवाडी येथे आयोजित महाश्रमदानात जिल्हाधिकारी पी.शिवशंकर यांनी ग्रामस्थांसोबत श्रमदानात सहभाग घेवून जलसंवर्धनाबाबत ग्रामस्थांना मार्गदर्शन केले.
            पाणी फाऊंडेशनमार्फत चालु वॉटर कप स्पर्धेत गंगाखेड तालुक्यातील अरबुजवाडी, सुप्पा जहांगिर, सुप्पा खावसा या गावांना जिल्हाधिकारी पी.शिवशंकर यांनी भेट दिली. यावेळी त्यांच्यासमवेत जिल्हा परिषदेचे मुख्य कार्यकारी अधिकारी पृथ्वीराज बी.पी., उपविभागीय अधिकारी कमलाकर फड, तहसिलदार स्वरुप कंकाळ, गटविकास अधिकारी प्रविण सुरडकर आदि उपस्थित होते.
             अरबुजवाडी गावासाठी रिलायन्स फाऊंडेशनमार्फत देण्यात आलेल्या पोकलेन मशीनद्वारे कामाचा शुभारंभही जिल्हाधिकारी पी.शिवशंकर यांच्या हस्ते करण्यात आला. यावेळी त्यांनी गावात झालेल्या शोष खड्यांची पाहणी केली व झालेल्या कामाबद्दल समाधान व्यक्त केले.
            सुप्पा जहांगिर येथील वॉटरकप स्पर्धेतंर्गत झालेल्या सलग समतल चरची पाहणी करुन उपस्थित ग्रामस्थांना मार्गदर्शन केले तसेच सुप्पा खालसा शिवारातील रिलायन्स फाऊंडेशन मार्फत होणाऱ्या माती नाला बांधचे भुमिपूजन जिल्हाधिकारी पी.शिवशंकर यांच्या हस्ते करण्यात आले. यावेळी संबंधित अधिकारी,  कर्मचारी, ग्रामस्थ मोठ्या संख्येने उपस्थित होते.
-*-*-*-*-

Wednesday, May 1, 2019

महाराष्ट्र राज्य स्थापनेचा वर्धापन दिनानिमित्त जिल्हाधिकारी पी. शिवशंकर यांच्या हस्ते ध्वजारोहण







      परभणी, दि. 1 :- महाराष्ट्र राज्य स्थापनेच्या 59 व्या वर्धापन दिनोत्सवानिमित्त बुधवार दि.1 मे 2019 रोजी सकाळी 8 वाजता प्रियदर्शनी इंदिरा गांधी स्टेडियम परभणी येथे मुख्य शासकीय ध्वजारोहण जिल्हाधिकारी पी.शिवशंकर यांच्या हस्ते संपन्न झाले.
            याप्रसंगी पोलिस अधिक्षक कृष्णकांत उपाध्याय, जिल्हा परिषदेचे मुख्य कार्यकारी अधिकारी पृथ्वीराज बी.पी., महापालिका आयुक्त  रमेश पवार आदींची प्रमुख उपस्थिती होती.
यावेळी जिल्हाधिकारी पी.शिवशंकर यांनी परेडचे निरीक्षण केले.  परेडमध्ये पोलीस दल, गृहरक्षक दल, पोलिस बँडपथक, सैनिक शाळा, स्काऊट व गाईडचे विद्यार्थी, बॉम्ब नाशक पथक,  फॉरेन्सीक मोबाईल वाहन, आरोग्य विभागाचे वाहन व रुग्णवाहिका आदींचा समावेश होता.  जिल्हाधिकाऱ्यांनी जनतेला उद्देशुन शुभेच्छा संदेशही यावेळी दिला. आदर्श तलाठी पुरस्कार सुदाम खुगे यांना मान्यवरांच्या हस्ते प्रदान करण्यात आला. या कार्यक्रमास अपर जिल्हाधिकारी विश्वंभर गावंडे, निवासी उपजिल्हाधिकारी अंकुश पिनाटे, उपजिल्हा निवडणूक अधिकारी तथा उपजिल्हाधिकारी महादेव किरवले,  उपजिल्हाधिकारी श्रीमती सुकेशिनी पगारे, यांच्यासह स्वातंत्र्य सैनिक, नागरिक, विद्यार्थी, पत्रकार आदि मोठ्या संख्येने उपस्थित होते.
-*-*-*-*-